Byreku është padyshim ndër gatimet më të preferuara dhe tradicionale mes shqiptarëve.
Pavarësisht mbushjes që përdoret në përgatitjen e tij, e cila padyshim është thelbësore për shijen që i jep çdo byreku, një tjetër detaj i rëndësishëm është edhe pjekja e tij, proces që kërkon patjetër kujdes.
Emathja ju sjell disa këshilla të vlefshme, të cilat do t’ju ndihmojnë të piqni byrekun në mënyrën më perfekte dhe të arrini një shije të përsosur.
### Kur Byreku Përgatitet me Petë të Bëra Vetë
Nëse petat e byrekut i keni përgatitur vetë, fillimisht duhet të parangrohni furrën në 200 gradë Celsius.
Temperatura duhet të jetë e lartë, pasi petat e bëra vetë kërkojnë më shumë kohë për t’u pjekur.
Pasi byreku është gati dhe e keni vendosur në tepsi, futeni në furrë në anën e poshtme.
Kontrollojeni pas 15-20 minutash për të parë nëse është pjekur mjaftueshëm në anën e poshtme. Më pas, kalojeni në skarën e sobës në pjesën e mesme për t’u pjekur në anën e sipërme.
Në këtë moment, ulni temperaturën e sobës në 180 gradë dhe lëreni të piqet derisa sipërfaqja e byrekut të marrë një ngjyrë të artë të kuqërremtë.
Fikeni furrën dhe lëreni byrekun të pushojë në ngrohtësinë e saj përreth 20-30 minuta përpara se ta shijoni.
### Kur Byreku Përgatitet me Petë të Gatshme
Nëse përdorni petë të gatshme për byrekun, furrën duhet ta parangrohni në një temperaturë më të ulët, pasi petët e gatshme kanë veti të piqen shumë shpejt ndërkohë që mbushja brenda nuk piqet sa duhet.
Emathja ju këshillon që furrën ta parangrohni në 180 gradë Celsius.
Edhe në këtë rast, fillimisht futeni byrekun në furrë në pjesën e poshtme që të piqet nga ana e poshtme e tij.
Kontrollojeni pas 15-20 minutash për të parë nëse është pjekur mjaftueshëm dhe më pas kalojeni në skarën e mesme për t’u pjekur në anën e sipërme, duke mos ndryshuar temperaturën.
Sapo të piqet, lyejeni me pak qumësht në sipërfaqe dhe fikni furrën.
Në të dyja rastet, pasi byreku të jetë pjekur mos e nxirrni menjëherë nga furra, por lëreni të kullojë në temperaturën e saj që është ende e ngrohtë.
20-30 minuta pas pjekjes, byreku është ende i ngrohtë dhe mund ta servirni për ta konsumuar./Emathja.com
© 2024, EMATHJA. All rights reserved.