Veturat elektrike thuhet se janë më të lira për servisim

Ndërsa shumë shoferë ende hezitojnë të kalojnë në automjete elektrike për shkak të çmimeve të larta, mungesës së pikave të karikimit dhe shqetësimeve për diapazonin e baterive, një përfitim është kostoja më e përballueshme e kontrollit teknik, sipas një raporti të ri.

Analiza e vitit të kaluar zbuloi se modelet tërësisht elektrike janë “dukshëm më të lira për servisim se të gjitha llojet e tjera të veturave”.

“Servisimi i vogël” i një veture elektrike kushton mesatarisht 117 euro, ndërsa veturat me naftë janë më të shtrenjtat me një mesatare prej 185 euro.

Pas tyre vijnë hibridet (181 euro) dhe veturat me benzinë (172 euro).

BookMyGarage thotë se një arsye kryesore për kostot më të ulëta të servisimit të veturave elektrike është se ka më pak pjesë lëvizëse dhe për këtë arsye kërkohet më pak punë për mirëmbajtjen tipike në krahasim me një motor tradicional.

Në përgjithësi, një automjet elektrik vlerësohet të kushtojë 43 për qind më pak se një veturë me djegie të brendshme për sa i përket kostove të mirëmbajtjes.

Reduktimi i punës do të thotë se servisimi i një automjeti elektrik kërkon më pak punë dhe më pak pjesë këmbimi dhe lëngje, duke ndihmuar në uljen e kostove.

Megjithatë, ndërsa kostot e servisimit janë më të ulëta, çmimet e tyre fillestare mbeten pengesa më të mëdha që pengojnë shumë shoferë të kalojnë në modelet elektrike.

Instituti Britanik i Industrisë së Motorëve është i shqetësuar se numri i teknikëve që fitojnë kualifikime për të punuar në mënyrë të sigurt në veturat elektrike është më i ulët.

Informacioni më i fundit tregon se vetëm një nga gjashtë punëtorët të riparimit dhe mirëmbajtjes së automjeteve në Britani të Madhe është aktualisht i kualifikuar për të punuar në automjete elektrike.

Nga fillimi i janarit deri në fund të shtatorit 2022, më shumë se 11,500 teknikë morën trajnimin e kërkuar për të marrë kualifikimin “IMI TechSafe” për të punuar në automjete elektrike – një kualifikim i njohur në nivel kombëtar.

Pavarësisht kësaj rritjeje, IMI thotë se është e shqetësuar se ritmi i ngritjes së aftësive të punëtorëve po ngadalësohet dhe se Britania mund të ketë mungesë teknikësh përpara fundit të dekadës.